رسالة موجهة لمعالي نائبة وزير التربية والتعليم

كتب. عبدالله القرزعي
لفت انتباهي تناقل عدة مواقع إلكترونية وبإشادة رداً لمعلمة على توجهات معالي نائبة وزير التربية والتعليم .
لن أسبق لكم مصدر لفت انتباهي قبل أن اطلعكم على نص ماكتبت المعلمة ؛
كتبت المعلمة ما يلي :

( المسئولين للأسف عايشين في أبراج عاجية ؛ ما ينزلون أنفسهم لواقع الناس ؛ ما أدري ليش ارتبطت معي صورة ( نورة الفايز ) بوزير العمل ( غازي القصيبي ) ؛ كلاهما وجهان لعملة واحدة.
غازي القصيبي بكل بساطة يقول ( ما فيها شيء لو توظف الشاب السعودي براتب 1500 أو 2000 ) مجنون يتكلم وعاقل يسمع.... سألتكم بالله متى يتزوج ومتى يبني بيت ومتى يقدر يكوّن نفسه !!!
أي منطق وأي عقل يقبل هذا الكلام !
ونورة الفايز تتفصحن وتقول 30 إلى 35 حصة
تعالي يا أبله نورة لمدرستنا ( مبنى مُستأجر فيه 300 طالبة ؛ الساحة حوش صغير مسقوف بشينكو والفصول 4م في 3م هذي طبعاً لأبناء أصحاب البيت ؛ واللي فصولهم كبيرة عل ى 6م في 7م هذا مجلس الرجال والمقلط ؛ واللي على 5م في 4م مجلس الحريم ؛ والصالة الكبيرة تحت موزعة فيها بعض المرافق مثل غرفة المرشدة والمكتبة وغرفة المديرة والمدرسات ؛ والحوش أقصد الساحة الخارجية مسوين فيها حمامات خارجية ومعامل الفيزياء والأحياء والكيمياء ؛ وفيه جزء مسقوف بشينكو هذا للمصلى وآخر للمقصف ( يعني بيت جحا على قولتهم ) ؛ إذا جاء مطر كل المرافق الخارجية ( تخر موية )
كراسي الطالبات واصلة للسبورة يعني يدوب المعلمة تقدّر تكتب ولاحظوا معي أحبتي أن السبورة طباشير
يعني أنواع الحساسية !!!! شيء مقرف
ونسيت أقولكم شئ مهم المكيفات ما تبرد ( تنفخ هواء على الواحد ) ؛ الكل يحمل في يده مروحة صغيرة ( الله يخلي المنشورات والمطويات والله لها فايدة غير فائدة القراءة )!!! نتثقف ونتهوى !!!!
عجبي ثم عجبي على المسؤولين
واللي يقهر ويبط الكبد إذا جاء مسؤول يزور المنطقة يخلونه يزور المدارس الحلوة المثالية؛ يا ناس يا عالم كيف نقدر نتطور !!!!!!!!
تعالي يا أستاذتي العزيزة نورة يوم واحد ؛ لا تعالي بعد الفسحة ولمدة نصف ساعة تعالي للساحة واجلسي ثواني
ونشتكي من رائحة البنات !!! بعذرهم والله
أنا كل يوم آخذ دش ومع ذلك ما فيه فايدة !!!
تعالي اشتري فطورك من المقصف واجلسي على الأرض أشوف بتقدرين تاكلين وإلا لا !!!
تعالي أيام الاختبارات وذاكري بالساحة أشوف تقدرين تستوعبين وإلا لا !!
تعالي حلي الأسئلة بفصل ضيق حار أشوف تقدرين تكتبين وإلا لا !!!
تعالي يوم واحد واشرحي للطالبات وشوفي لا مبالاتهم وعدم اهتمامهم ووقحاتهم أشوف تقدرين تقولين كلمتين على بعض وإلا لا !!!
تعالي اجمعي الطالبات في الساحة لندوة أو محاضرة وشوفي كتل اللحم كيف على بعض كيف تقدرين تمرين بينهم !!
تعالي مكان معلمة عربي أو دين أو إحدى المواد العلمية دسمة المعلومات أشوف تقدرين تعطين
ست حصص وراء بعض !! تكلمي لمدة 45 دقيقة فقط أشوف بيستمر نفَسكِ وإلا بينقطع ! تعالي ساعة من ضمن 7 ساعات
وعيشي معنا عيشي وسطنا عيشي بينا أشوف تقدرين تستمرين.....أشوف تقتنعين براتبك ! أشوف بتسكتين على الدرجة المُستحقة والفروقات اللي راحت عليك !
تعالي الله يخليك
أنا مستعدة أحجز لك في أفخم فندق في المنطقة ؛ وأوعدك اليوم اللي تجين فيه بخلي البنات يوزعون
مطويات ومنشورات عشان تهفين على نفسك فيها ولا تخافين بندفع فيها فلوس من جيوبنا وبنخليها
من ورق مقوى عشان يكون هواها أقوى
أقول يا أستاذتي الفاضلة
ما الذي تعرفينه عن المدارس أو ما الذي تعرفينه عن التعليم !!!
بل ماذا يعني لك مُسمى ( تربية وتعليم ) !!!!!!

تعليقي :
أحايين كثيرة يصدر من البعض ما يشير إلى :
امتلاكه الحقيقة بل الحقيقة المطلقة .... وغير ما يقول فلسفة.
تشخيص الواقع ومقته .......وعزل نفسه ولو أنه جزء من هذا الواقع.
موقف سلبي حدث له .... يقيم الدنيا ولا يقعدها ويجرد الكل من كل معان جميلة.
تخفيه خلف الأسوار .... وقذف الأخرين بحمم (ثكلتك أمك يا معاذ).
تحديده المشكلات .... على ألا يعتبر نفسه جزءاً منها.
يطلق لنفسه العنان ..... لينتقم من واقع مؤلم.
إملاء النفس الأمارة بالسوء وتغليب السلبية والتشاؤمية ... لكي يقلق الناس.
يدعي البعض أنه داعي إصلاح ...... (وهم يحسبون أنهم يحسنون صنعاً)
التيه تحت مضلة الصراحة .... ويجول في الكلمات والألفاظ بلا معاني.
لا يفصل بين احباطاته ..... وواقع يعيشة ويجب أن يتعايش معه إلم يتفق معه.
اعتقاده أن لغة الحوار هي : أن تخرج لسانك ليصل شحمة أذنيك ... وتجزم أنه الحق.
والبعض الأخر منا ......
يغلبون الحكمة ولغة العقل والمنطق ويتعوذ من الشيطان الرجيم ويدعوا لنفسه وللآخرين بحسن القول والعمل والصلاح.
ويبالغ البعض ..........
في تعميم الصور السلبية وكبت الإيجابية منها (وإذا قيل له اتق الله أخذته العزة بالإثم ) ؛ فكل مايختلج في نفسه الأمارة بالسوء ويؤازرة الشيطان فيه ؛ يعتبره حقيقة يصدح بها في كل مكان ؛ ويتجاهل (ثكلتك أمك يامعاذ وهل يكب الناس في النار على وجوههم إلا حصائد ألسنتهم).
إنه ايمانهم بنظرية المؤامرة !!! وإنه الانتقام اللعين ...
فويل لمن ربى وتربى عليه وأشاعه وعمل به.

صورة الختام ...
قدم رجل لعلي بن أبي طالب رضي الله عنه وقال : كثرت الفتن في عهدك ؛ ولم نعرفها في عهد من قبلك؟
فقال علي رضي الله عنه : أولئك كانوا الرؤساء (يشيد بالنبي صلى الله عليه وسلم وأبو بكر وعمر وعثمان رضي الله عنهم) ؛ وكنت أنا وطلحة والزبير المرؤوسين (سمعاً وطاعة وامتثالاً بحق)!!!
أما في عهدي فكنت أنا الرئيس (تواضعاً منه أنه أقل من من قبله) وكنت أنت ومن على شاكلتك المرؤوسين.
قاتل الله جهل المرؤوس وهداه سبل الرشاد وأنجاه من سوء ضنونه وضنه وكيده لنفسه ؛ وأعان كل مسؤول حمل أمانة الأمة حق حملها.
تحياتي لكم